Kolegji i Posaçëm i Apelimit, ka vendosur në mënyrë unanime të rrëzojë ankimin e ish-kryetares së Gjykatës së Lartë, Shpresa Beçaj, e cila u shkarkua prej Komisionit pasi nuk dorëzoi në kohë deklaratat në funksion të procesit të rivlerësimit me pretendimin se nuk ishte “gjyqtare në detyrë”.
Në vitin 2020 Komisioni i Pavarur i Kualifikimit ka shkarkuar nga detyra ish-kryetaren e Gjykatës së Lartë, gjyqtaren Shpresa Becaj, e cila nuk pranoi që të bashkëpunonte me vettingun, pasi nuk plotësoi formularin e deklarimit të pasurisë.
Beçaj ka kërkuar rrëzimin e këtij vendimi por Trupi gjykues i Kolegjit të Posaçëm të Apelimit nuk e mori për bazë kërkesën e saj duke lënë në fuqi shkarkimin e saj, vendim i marrë më datë 03.07.2020.
Njoftim vendimi
Trupi gjykues i Kolegjit të Posaçëm të Apelimit, i përbërë nga Rezarta Schuetz kryesuese, Mimoza Tasi relatore, Albana Shtylla, Ina Rama, Sokol Çomo anëtarë, shpalli vendimin për çështjen (JR) nr. 55/2020, datë 07.12.2020, që i përket ankimit të subjektit të rivlerësimit Shpresa Beçaj kundër vendimit të Komisionit të Pavarur të Kualifikimit nr. 270, datë 03.07.2020.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
1.Lënien në fuqi të vendimit nr. 270, datë 03.07.2020 të Komisionit të Pavarur të Kualifikimit, që i përket subjektit të rivlerësimit Shpresa Beçaj.
2.Ky vendim është përfundimtar dhe ka efekt të menjëhershëm.
U shpall sot, në Tiranë, më datë 01.12.2022
