Nënë Liza, simboli i protestave të banorëve te “5 Maji” ishte e ftuar sot në Mcn Tv, ku ka deklaruar se për pronën e saj të shembur nuk do të firmosi asnjë dokument që lëshohet nga Erion Veliaj apo Edi Rama.
Po ashtu ajo ka thënë se edhe sikur bukë e kripë të hajë, sërish nuk do të firmosë.
“Bukë e kripë do të ha, nuk firmos. Një ditë të punojë Edi Rama me Erion Veliajn, si punojnë fëmijët e mi, asnjë shtëpi nuk do të prishnin. Unë nuk firmos sepse ata janë motër e vëlla, janë për të mashtruar. Kam pasur burrin 15 vite sëmurë, nuk më ka ofruar asnjë ndihmë. Edhe partitë e tjera nuk e kanë çarë kokën fare asnjë. Duhet të kishin ardhur” – tha nënë Liza.
Banesat në zonën e 5 Majit po prishen pasi janë në hartën e projektit të bashkisë së Tiranës si ‘zonë në zhvillim” dhe parashikohet ndërtimi i pallateve ku do të strehohen familjet që u është dëmtuar banesa nga tërmeti i 2019.
Pas shembjes së banesave duket se në këtë zonë ka rënë qetësia, por banorët ende nuk janë të sigurt nëse do të marrin aq sa u takon dhe mbi të gjitha kur do të marrin shtëpitë e reja.
Dyshime janë ngritur për procedurën e ndjekur, që nga shpronësimi për interes publik e deri tek mënyra e tenderimit dhe zbatimit projektit.
