Qëndresa Qytetare organizoi sot një protestë-homazh përpara Ministrisë së Arsimit dhe Sportit për të ironizuar mbylljen e degëve të studimit në universitetet publike të vendit.
Gjatë deklaratës për mediat, Gevio Tabaku, përfaqësues i Qëndresës Qytetare, tha se në 4 vitet e fundit janë larguar nga Shqipëria mesatarisht 8 studentë në ditë ose e përllogaritur ndryshe mbi 3 mijë të rinj në vit, një shifër alarmante që ka boshatisur auditorët në vendin tonë.
“Gjatë 4 viteve të fundit, janë larguar mesatarisht 8 studentë në ditë, ose rreth 3 000 studentë në vit nga universitetet publike, të cilat po boshatisen çdo ditë e më shumë. Rënia e cilësisë së arsimit publik ka bërë që regjistrimet në to të ulen 11.3%, kjo shifër vetëm në 3 vitet e fundit. Nëpërmjet vendimarrjeve politike të cilat sistematikisht janë marrë pa analizë, sot nuk ka asnjë tregues që këto vendimmarrje të kenë përmirësuar arsimin përkundrazi ato kanë penalizuar të rinjtë shqiptarë. Sot duket se jemi futur në rrugë pa kthim, vazhdojnë akoma vendimmarrjet politike të paanalizuara dhe vetëm për të mbyllur gropat që vetë politika hap mbi sistemin arsimor. Besoj se të gjithëve ju kujtohet shpallja dhe trumpetimi i Programeve Prioritare të Studimit. 35 programe të cilat tashmë janë braktisur nga studentët do ti ofronin atyre një bursë mujore në vlerën e pagës minimale,” u shpreh Gevio Tabaku.
Një tjetër tha se Ministria e Arsimit nuk ka marrë parasysh asnjë nga problematikat e universitetit.
“Qeveria do të humbasë në harresën e të shkuarës pasi planifikoi shkatërimin e universitetit. Problematikat e shumëpërmedura nga ne dhe të parët tanë përsëriten pasi nuk dëgjohen nga ministria që përfaqëson arsimin, që i përfill dhe mendon se me anë të një burse do n’a gënjejë. Kjo nuk është hera e parë që studentët po protestojnë këto janë të njëjat problematika të njejtat shqetësime dhe gjithmonë nuk dëgjohen ose anashkalohen”, tha studentja.
