110-vjetori i pavarësisë do të bëjë bashkë në Tiranë, parlamentarët e Shqipërisë dhe të Kosovës.
Për herë të parë, ligjvënësit e dy Kuvendeve do të mblidhen sot, më 27 nëntor në orën 10:00, në sallën e seancave plenare.
Mësohet se mbledhja është parashikuar rreth 2 orë dhe gjithçka do të përmbyllet brenda ditës së sotme.
Si mikpritëse, në cilësinë e drejtueses së Kuvendit, Lindita Nikolla do të hapë seancën plenare me një fjalë përshendetëse dhe më pas fjalën do e marrë homologu i saj në Kosovë, Glauk Konjufca.
Pas dy kryeparlamentarëve, do të jenë kryeministrat e dy vendeve, Edi Rama dhe Albin Kurti që do të mbajnë fjalën e tyre përpara deputetëve.
Grupet e punës të ngritura nga dy kuvendet po i japin dorën e fundit detajeve përfundimtare, ku është menduar që një fjalë të rastit të kenë edhe kryetarët e grupeve parlamentare.
Në shënim të këtij përvjetori, pritet të mbahen edhe aktivitete të tjera kulturore.
