Porti i Durrësit është kthyer në “mollën e sherrit”, për politikën shqiptare.
Edhe pse në prag të seancës së Kuvendit, ku do miratohet marrëveshja e Portit të Durrësit, Bashkimi Europian dha një sinjal se është kundër, kryeministri Edi Rama sërisht nuk tërhiqet.
Gjatë fjalës së tij në Kuvend, ai tha se Porti i Durrësit është si në mesjetë. Rama tha se është krenar për marrëveshjen, ndërsa shtoi se mezi e pret miratimin e saj.
“Një port si në mesjetë, ku lulëzojnë sipërfaqet e ndryshkura dhe ku kalben mjetet lundruese, ku shtrihen mijëra metra katrorë ferra dhe ndryshqe, kur ju dëgjon ju dhe shikon këto pamje e kupton pse jemi të shqetësuar. Ju jeni fiks si këto”, u shpreh ndër të tjera Rama.
“Personalisht, jo vetëm si kryeministër, por edhe si deputeti i Durrësit me shumë padurim dhe me gëzim po numëroj orët derisa të votohet për këtë marrëveshje për investimin më të madh të huaj në historinë e vendit tonë,” tha Rama.
Rama nuk i ka kursyer as ofendimet kundrejt opozitës, teksa i ka quajtur si fisi gagaçopulli, pasi kanë kundërshtuar ndërtimin e Portit të Durrësit.
“Ekeni vënë re, çdo punë që nisim e pagëzojnë si aferë të madhe. Fisi gagaçopulli. Është fis i pakurueshëm në gjak. Nuk pres mirëkuptimin e fisit gagaçopulli. Ndaj do të ikë që aty për t’ju përshtatur kohëve të sotme, ambicieve të Shqipërisë në shekullin e XXI.. S’mund të rri në zemrën e një qyteti turistik, porti më i madh i vendit. Nuk mund të rri aty, ku nuk ka asnjë mundësi zgjerimi, ku prish imazhin e Durrësit. Kjo s’është ndonjë gjë që e themi sot. Unë e kam thënë këtë prej vitesh. Të gjithë shqiptarët pa atdhe, që tani po sillen si gomaricat këtë punë kanë. Në Durrës do të bëhen të dy portet. Kjo është fatkeqësia juaj, se nuk e dini. Këto nuk po i them unë. këto janë gomarocat e Faik Konicës,” tha Rama.
