Gjykata e Tiranës ka lënë në fuqi vendimin e Prokurorisë për të mos filluar hetimet ndaj kallëzimit që kishte bërë gazetari Osman Stafa për mungesën e ilaçeve në QSUT për fëmijët që bëjnë kimioterapi.
Gjatë një reagimi në rrjetet sociale, Stafa rendit njëra pas tjetrës disa nga shkeljet që ka bërë Gjykata me vendimin e saj për të mos filluar hetimet ndaj mungesës së këtyre medikamenteve të cilat janë jetike për fëmijët e sëmurë. Sipas tij, Gjykata ka bërë një shkelje të rëndë pasi nuk e konsideron vepër penale faktin që fëmijëve të sëmurë u është mohuar mjekimi që i shpëton jetën.
Më herët, vetë Stafa ka bërë një investigim të mbështetur nga Ambasada Amerikane në Tiranës, sipas të cilit ka dalë në konkluzionin se 4 medikamente (asparaginaza, 6 merkaptopurina, methotrexat, acidi folinik) kanë munguar përgjatë 2 viteve të fundit në Onko-Hematologji, në QSUT.
Reagimi i plotë nga gazetari Osman Stafa:
“ABSURDI I NJË VENDIMI GJYKATE
Jam zhgënjyer totalisht nga vendimi i Gjykatës së Tiranës, pas vendimit që mori, për lënien në fuqi të vendimit të Prokurorisë së Tiranës, për “mosnisje të hetimeve” për mungesën e ilaçeve në QSUT.
Shikoni absurdin!
Gjyqtari thotë, se mungesa e ilaçeve jetëshpëtuese konsiderohet një rrethanë shumë e rëndë mjeksore e sociale. Pra, gjyqtari e pranon faktin e mungesës së medikamenteve dhe rrezikut që vjen prej kësaj mungese. Por Gjykatësi vazhdon logjikën se “Gjykata Penale është e detyruar të marrë në analizë raste kur konstatohet vepra penale”.
⁉️ Por a s’është vepër penale t’i mohosh një fëmije mjekimin që i shpëton atij jetën?
Pastaj Gjykatësi Albert Meça thotë që kallzuesi (unë) kam kërkuar të pyeten mjekët dhe familjarët, në shërbim të hetimit.
Dhe pastaj gjyakatësi vlerëson se kallzuesi (unë) nuk kam pretendime ndaj mjekëve dhe për këtë arsye ata s’kanë pse pyeten. Për argumentin tjetër që të pyeten edhe familjarët ai nuk thotë gjë.
Z. Gjykatës, dëshmia e mjekëve dhe e familjarëve do të hedhë dritë mbi mungesën e ilaçeve. Këtë veprim Prokuroria se ka bërë. Si mundet prokurori të bëj një hetim, pa pyetur të lënduarit?
Pjesa më e tmerrshme vijon sa më poshtë:
⛔️ Gjykata nuk i jep përgjigje në organizimin e procedurave, mungesës së hapsirës ligjore, nevojës së ndryshimeve ligjore, shkaqeve administrative apo politikave që ndiqen nga institucionet që kanë për detyrë furnizimin me barna dhe ilaçe.
⚠️ Kush i kërkon Gjykatësit të merret me këto çështje? Gjykatësi ka prova mbi tavolinë, dhe ato vërtetojnë MUNGESËN E MEDIKAMENTEVE (KIMIO) për fëmijët, për 2 vite, që unë kam investiguar.
Nuk është në përgjegjësi të Gjykatësit të mendojnë për vakum ligjor, apo çështje të tjera. Gjykatësi vendos vetëm mbi provat, dhe provat ai i ka pasur mbi tavolinë.
Absurdi logjik vazhdon edhe më tej!!!
🔴 Gjykata thotë: Fakti i mossigurimit/mungesës së ilaçeve, për shkak të mungesës së ofertave (në tendera), nuk mund të jetë objekt i analizës penale.
I takon, thotë Gjykata, orageve të tjera, Legjislative dhe Ekzekutive, të marrin masat e nevojshme.
⚠️ Pra, Gjyqtari Albert Meça, thotë se cënimi, rreziku për jetën i një fëmije prej mungesës së ilaçeve, s’është vepër penale, veçse një gabim ligjor, që duhet ta zgjidhin institucionet përkatëse.
Më shumë se i zhgënjyer jam me këtë vendim, qartazi pa logjikë. Nuk e di kanë ndjesi njerëzore, apo çfarë janë. Por është e tmerrshme kjo që po ndodh. Unë këtë çështje nuk e lë, do e ndjek në Gjykatën e Apelit, e në çdo shkallë tjetër.
Jam kam borxh shumë fëmijëve, më të cilët për 4-5 vite festonim bashkë ditëlindjet e tyre, u bënim dhurata që ata donin e kërkonin. U kemi siguruar medikamentet që ata kishin nevojë kur spitali nuk kishte. Dhe kjo është e vërteta! E vërteta që një ditë, uroj me shpirt, të gjej drejtësi!!!”
