Porti i ri i peshkimit, i zaptuar deri më tani nga jahtet, skafet dhe gomonet e biznesmenëve e personave të konsideruar VIP, u rikthehet peshkatarëve.
Ka qenë një urdhër i ministrit të Bujqësisë Niko Peleshi (sektori i peshkimit është në varësi të këtij dikasteri), i cili ka vënë në lëvizje autoritetin portal, Policinë Kufitare dhe rojën bregdetare të marrin masa.
Përfunduar dy vite më parë, porti i ri i peshkimit në Durrës, me të gjithë infrastrukturën mbështetëse, ishte kthyer në vend ankorimi për jahtet, gomonet, skafet dhe velierat e të pasurve të Durrësit e të gjithë Shqipërisë.
Prokuroria dhe Policia kishin ngritur dyshime se një pjesë e këtyre mjeteve lundruese përdoreshin për aktivitete të kundraligjshme, përfshirë këtu trafikimin e lëndëve narkotike. Ndaj, sipas burimeve, urdhri i dhënë mund të ketë lidhje, pikërisht me këto dyshime të raportuara në kohë nga ana e Policisë.
Por mbi të gjitha, zaptimi i portit të ri të peshkimit nga skafe, veliera dhe jahte luksoze, pengonin që porti i ndërtuar për flotën e peshkimit të ushtronte aktivitetin e tij, për të cilin edhe u ndërtua.
“Urdhërohej largimi i skafeve, gomoneve dhe jahteve nga porti i ri i peshkimit. Urdhri i Ministrisë kishte për qëllim të largonte zaptuesit e portit dhe t’ia rikthente atë peshkatarëve durrsakë për të strehuar flotën e peshkimit”, bënë të ditur burime nga autoriteti portal. Por, sipas burimeve konfidenciale, urdhri kishte për qëllim edhe pengimin e aktiviteteve kriminale, që dyshohet se ushtroheshin nga disa prej këtyre mjeteve lundruese, pronarët e të cilëve kishin zaptuar thuajse forcërisht portin e peshkimit.
“Urdhri për largimin e skafeve, gomoneve, jahteve dhe velierave u mor fill pasi plasi ‘bomba’ e përgjimeve nga Italia për trafikun e drogës, i cili është realizuar me anë të mjeteve detare, skafeve dhe gomoneve. Pronarët e disa dhjetëra mjeteve lundruese, të ankoruara në këtë port prej vitesh, morën urdhër në fundjavë që të largoheshin nga porti i Durrësit.
Gomonet dhe skafet u transportuan kryesisht me rrugë tokësore duke u vendosur nëpër karrela e duke u tërhequr nga automjete të fuqishme, ndërsa jahtet lundruan në jug të vendit dhe një pjesë tjetër në drejtim të porteve malazeze, ku edhe do të dimërojnë”, thanë burime për gazetën.
Mësohet se të gjitha lëvizjet (largimi) e këtyre mjeteve janë regjistruar nga Policia Kufitare. Në këto kushte, porti i ri i peshkimit në Durrës, më në fund u kthehet peshkatarëve. Këta të fundit, prej katër ditësh, kanë zhvendosur anijet dhe barkat e peshkimit nga porti i vjetër në portin e ri.
Peshkatarët shprehen të kënaqur që tashmë po zhvillojnë aktivitetin e tyre në kushte shumë të mira, ndërsa shprehin rezerva sa i përket realizimit të projektit. Ndërtimi i portit të ri të peshkimit në Durrës kushtoi plot 11 milionë dollarë, të akorduara nga Banka Islamike.
