Një tjetër çështje që zien këto ditë në publik është edhe ajo e fikjes së radarëve që mbikëqyrin hapësirën detare të vendit, duke u dhënë dorë trafikantëve të kanabisit të shkojnë të pashqetësuar në Itali.
Fikja dhe mosmbulimi i gjithë hapësirës detare nga radarët e ka konfirmuar Animafia Italiane që ka hetuar grupin e Habilajt. Në përgjigjet e bëra, është pikërisht Moisi Habilaj ai që thotë se kishte njeriun e tij në qendrën e radarëve që i jepte informacione se kur duhej të lëvizte.
Denoncimet për këtë çështje janë bërë nga nënkryetari i LSI-së, Luan Rama, të cilat gjetën sot një përgjigje nga Olta Xhaçka, ministre e Mbrojtjes.
‘I nderuari deputet Luan Rama, në mënyrë të përsëritur sulmon Ministrinë e Mbrojtjes me “të vërteta” të pavërteta. Dhe ka zgjedhur mediat e të gjitha llojeve për ta bërë këtë gjë, përfshirë edhe rrjetin social. Pasi ngre akuzat e radhës, bën pyetje në distancën e kontaminuar nga politika e baltës dhe balta e dizinformimit mediatik, për të cilat kam vetëm një përgjigje për të nderuarin Luan. Të kërkojë një interpelancë parlamentare dhe do të jem në dispozicion për të dhënë të gjithë informacionin zyrtar, me përgjegjësi të plotë institucionale’, është shprehur Xhaçka.
Pas kësaj deklarate ka ardhur reagimi tjetër i Luan Ramës:
E nderuar zonja Ministre!
Në respekt të etikës së komunikimit edhe me ju personalisht e në koherencë me qëndrimet e mia institucionale, politike e publike, me lejoni t’jua bëj të qartë se e pranoj sfidën tuaj, jo si sfidë me ju dhe as me Ministrinë e Mbrojtjes dhe Forcat e Armatosura, por me mosveprimin kriminal dhe korrupsionin që ka çuar në lënien jashtë funksioneve operacionale, të sistemit të vëzhgimit të hapësirës detare të Republikës së Shqipërisë, që për fat të keq nuk është e vetmja shfaqje e shkeljes apo e moszbatimit të ligjit!
E sa për baltën dhe baltën e dezinformimit mediatik, me lejoni t’ju siguroj qe as kanë patur e as kanë për të patur ndonjëherë lidhje me mua dhe as qëndrimet e mia!
Ju, për shkak të detyrës që kryeni, mund ta verifikoni dhe konfirmoni këtë të vërtetë timen, që pa modesti më lejoni t’jua them se e gjeni edhe në Ministrinë e Mbrojtjes!
Për një gjë ju siguroj: zbardhjes së të vërtetës së mosfunksionimit të radarëve, (siç dëshmohet edhe nga përgjimet e antimafias italiane për veprimtarinë e grupeve të strukturuara kriminale të trafikut të drogës, rezulton që ata kishin njerëzit e tyre dhe komtrollonin edhe sistemin e radarëve), do t’i shkoj deri në fund!
Edhe për të mirën tuaj natyrisht zonja ministre!
