Prokuroria e Lushnjës ka shtuar edhe dy akuza të tjera penale për Orges Xhelilin i cili disa ditë më parë plagosi me thikë Fredi Kokoneshin, kryetarin e Bashkisë së Divjakës dhe shoferin e tij Gazmir Bullarin.
Ndaj Xhelilit rëndojnë tre akuza të cilat janë, “Vrasje e funksionarëve publike”, e mbetur në tentativë, për episodin e goditjes së shtetasit Fredi Kokoneshi, veprën penale të “Vrasjes me dashje”, të mbetur në tentavivë, për episodin e goditjes së shtetasit Gazmir Bullari, dhe veprën penale të “Prodhimi, mbajtja, blerja apo shitja pa leje e armëve të ftohta”.
“Hetimet janë në fazën fillestare të tyre dhe se Prokuroria pranë Gjykatës së Shkallës së Parë Lushnje po kryhen verifikime në drejtim të dinamikës së ndodhjes së ngjarjes, motiveve, administrimin dhe këqyrjen e provave materiale, marrjen e deklarimeve nga persona që kanë dijeni mbi ngjarjen dhe kryqëzimin e tyre me njëra-tjetrën dhe me provat në tërësi, me qëllim hetimin objektiv të ngjarjes”, njofton prokuroria.
Kujtojmë se ditën e sotme u caktua masa e sigurisë “arrest me burg” për Orges Xhelilin.
- Si ndodhi ngjarja?
Më 11 nëntor Kryetari i Bashkisë Divjakë, Fredi Kokoneshi u plagos me thikë bashkë me shoferin e tij, pas një debati me një punonjësin e bashkisë Orges Xhelilin.
