Admir Bejo është gjetur këtë të dielë i pajetë në banesën e tij. Policia njofton se ai ëhstë gjetur nga familjarët, ndërkohë nuk janë konstatuar shenja dhune.
“Më datë 06.11.2022, në fshatin Perondi, Kuçovë, është gjetur nga familjarët në banesë i pajetë dhe pa shenja dhune shtetasi A.B., 45 vjeç, banues në fshatin Perondi, Kuçovë. Grupi hetimor dhe mjeku-ligjor, po punojnë për përcaktimin e shkakut të humbjes së jetës së 45-vjeçarit”, thuhet në njoftimin e policisë.
Paraprakisht dyshohet se Bejo ka pësuar trompozë në mushkëri dhe zemër, megjithatë nuk përjashtohet as pista e vdekjes nga mbidoza e drogës.
Bejo ka qenë shënjestër e një sulmi me armë në muajin gusht të këtij viti, kur mbeti i plagosur nga shoku i tij pas një konflikti të çastit në lagjen Nr.1 të Kuçovës.
Konflikti tre muaj më parë ndodhi në banesën e mikut të Bejos kur shtetasi me inicialet E.R., 36 vjeç qëlloi dy herë me pistoletë në drejtim të Bejos.
Bejo mundi të largohej për disa metra dhe ishin kalimtarët e rastit ata që e gjetën të plagosur.
Bejo njihej në qytet si përdorues i rregullt prej vitesh i lëndëve narkotike. Në vitin 2007, ai së bashku me vëllanë Ilija Bejon, kanë tentuar që të vrasin 2 vëllezërit Ardian Kundja dhe Saimir Kundja. Atentati ndaj këtyre të fundit u krye rreth orës 8:00 të mëngjesit, teksa dy vëllezërit ishin duke dalë nga hyrja e pallatit në të cilin jetonin.
