Ka qëndruar plot 3 orë në zyrat e SPAK deputetja e Partisë Demokratike, Jorida Tabaku, e cila është thirrur për të dëshmuar në cilësinë e personit që ka informacion për aferën e inceneratorëve.
Demokratja shkoi në Prokurorinë Speciale rreth orës 10:05, e teksa doli në orën 13:00 nuk nguroi të prononcohej për mediat, duke thënë se hetimet për çështjen e inceneratorëve kanë avancuar dhe së shpejti do të kemi të reja.
“Unë që në 2018 kam denoncuar aferën e inceneratorëve në emër të PD. Kemi sjellë 3 kallëzime, për inceneratorin e Tiranës, Fierit dhe të Elbasanit. Solla 9 kallëzime të tjera. I pari ishte për raportin dhe 8 të tjerët ishin për individë që gjykojmë për aferën e inceneratorëve, Janë 500 të akuzuar që kanë dalë në këtë komision dhe mbi 150 fakte ose grup fakte që ja kemi vendosur SPAK. Sot isha për çështjen e inceneratorit të Fierit dhe të Tiranës”, tha Tabaku.
Në vijim, Tabaku shtoi se ka qenë në komunikim të vazhdueshëm me SPAK, ndërsa zbuloi se sot ka shkuar në Prokurori për inceneratorin e Tiranës dhe të Fierit.
“Informova për zhvillimet e komisioni hetimor, për sqarime dhe faktet. Që lidheshin për dëshmitë dhe materialet që kemi mbledhur gjatë punës pranë komisionit dhe me komunikimet që kam pasur. Kam qenë në komunikim të vazhdueshëm me SPAK sa i përket hetimeve, duke kërkuar informacion se në çfarë ndodhen hetime, por dhe në statusin e personit që denoncova. Sot kam qenë në cilësinë e kallëzueset për Inceneratorin e Tiranës dhe të Fierit. Kam një listë dëshirash se kush duhet të vijë në SPAK. Sot si mora ata në pyetje, më kërkuan informacion. Shumë shpejt do të kemi të reja në fazën që ndodhen hetimet. Hetimi i aferës ka qenë një prioritet jo vetëm i punës time, por dhe hetimet kanë ecur në organin e akuzës”, deklaroi Tabaku.
