Një person i shpallur në kërkim për vrasje në Itali është arrestuar në Tiranë. Në pranga është vënë 49-vjeçari Ilir Paja.
“Njësia Speciale ‘Fast Albania’, bazuar dhe në inteligjencën informative, ka organizuar dhe finalizuar operacionin policor të koduar ‘Dangerous’. Si rezultat i këtij operacioni u bë e mundur kapja dhe arrestimi me qëllim ekstradimi drejt Italisë i shtetasit Ilir Paja, 49 vjec, banues në Tiranë. Ky shtetas ishte shpallur në kërkim ndërkombëtar si person shumë i kërkuar nga autoritetet Italiane pasi Gjykata e Apelit Milano/Itali, e ka dënuar me 25 vjet e 4 muaj burgim për vrasje, kryer në bashkëpunim dhe rrëmbim personi”, njoftoi policia.
“Lokalizimi dhe kapja e 49-vjeçarit u bë në Laprakë nga Njësia Speciale ‘Fast Albania’, në bashkëpunim me Interpol Tirana dhe shërbimet e Komisariatit të Policisë Nr. 3 Tiranë. Interpol Tirana në bashkëpunim me homologët italianë vijon punën për plotësimin e dokumentacionit me qëllim ekstradmin e 49-vjeçarit drejt Italisë”, shtuan të njëjtat burime.
