Me tone të forta, kryedemokrati Lulzim Basha ka numëruar sot gjithë arsyet se përse Edi Rama po e mbron me cdo kusht ish-ministrin Tahiri dhe pse e do atë të lirë dhe jo në burg.
Në një deklaratë për mediat nga selia blu, Basha ka akuzuar Ramën se ka bllokuar punimet e Këshillit të Mandateve dhe i bën thirrje atij të heqë dorë nga “ky presion rrugacëror ndaj prokurorëve. E ka kot, as paktet mafioze me Tahirin dhe ministrat e tjerë të lapur në flagrancë, as sulmet ndaj opozitës dhe medias nuk do e shpëtojnë dot nga e vërteta dhe drejtësia para qytetarëve”.
Sipas Bashës, kriminelët e vërtetë, provat e antimafias italiane kanë treguar tashmë se Habiljat me shokë bënin trafik droge dhe armësh të ndihmuar nga Tahiri dhe kupola e korruptuar e policisë.
“Shqiptarët janë ballafaquar me fakte të thjeshta dhe të kuptueshme nga të gjithë, antimafia italiane ka paraqitur prova ligjore të trafikut të bandës nga banda Habilaj ndihmuar direkt nga Tahiri. Dosja ju tregon shqiptarëve dhe gjithë botës se si krahu i djathtë i Ramës u kap në flagrancë në trafik droge dhe shteti është vënë në shërbim të trafikantëve”- tha ai.
