Kolegji i Posaçëm i Apelimit la sot në fuqi vendimin e KPK-së për shkarkimin nga detyra të gjyqtares Eda Kaja.
KPA njofton se trupi gjykues i Kolegjit të Posaçëm të Apelimit, i përbërë nga Ina Rama kryesuese, Mimoza Tasi relatore, Albana Shtylla, Rezarta Schuetz, Sokol Çomo anëtarë, shpalli vendimin për çështjen që lidhet me ankimin e subjektit të rivlerësimit Eda Kaja kundër vendimit të Komisionit të Pavarur të Kualifikimit.
“Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, me shumicë votash, vendosi: Lënien në fuqi të vendimit e Komisionit të Pavarur të Kualifikimit, që i përket subjektit të rivlerësimit Eda Kaja”, thuhet në njoftim.
Komisioni i Pavarur i Kualifikimit shkarkoi nga detyra më datën 16.11.2021 subjektin e rivlerësimit Eda Kaja, gjyqtare në Gjykatën e Rrethit Gjyqësor Durrës.
