Të shtëna me armë zjarri raportohen mbrëmjen e sotme në Tiranë. Sipas policisë bëhet me dije se të shtënat kanë ndodhur në zonën e “Kodrës së Diellit” në kryeqytet.
Paraprakisht dyshohet se Olsi Bllaci pas një konflikti ka plagosur me armë zjarri komshiun e tij, Jonian Shehu. I lënduari, një 35-vjeçar, mësohet se ndodhet jashtë rrezikut për jetën. Ndërkohë, autori është identifikuar dhe po punohet për kapjen e tij.
Njoftimi i Policisë:
“Plagosi me armë zjarri fqinjin e tij, identifikohet e shpallet në kërkim autori.
Më datë 27.10.2022, rreth orës 21:50, është paraqitur në Spitalin e Traumës për ndihmë mjekësore, shtetasi J. Sh., 35 vjeç, i plagosur me armë zjarri.
Me marrjen e njoftimit, shërbimet e Komisariatit të Policisë Nr. 1, kanë shkuar në vendngjarje, te Kodra e Diellit, dhe kanë bërë të mundur identifikimin dhe shpalljen në kërkim të autorit të dyshuar shtetasit O. B.
Nga hetimet paraprake dyshohet se shtetasi O. B., pas një konflikti ka plagosur me armë zjarri shtetasin J. Sh“, thuhet në njoftimin e policisë.
Grupi hetimor po punon për sqarimin e rrethanave të ngjarjes. Vijon kontrolli i zonës për kapjen e autorit të dyshuar të ngjarjes.
