Kategoria Superiore, ka hyrë në një fazë tepër interesante, teksa janë luajtur 9 javët e parë, Partizani kryeson me një diferencë +4 pikë nga Erzeni dhe Tirana që plotësojnë podiumin.
Një analizë për ecurinë e deri tanishme të kampionatit shqiptar, e bëri dhe Edi Martini, trajneri shkodran, që arriti të fitonte titullin me Teutën 2 sezone më parë. Në prononcimin e dhënë në Skype për emisionin “Sport News” të Trevisa Tufës, në “Neës24”, Edi Martini u shpreh:
“Partizani është më meritë aty ku është. Titulli? Shumë e vështirë. Unë jam i sigurt që janë nisur për një rrugë të tillë. Duke parë që disa skuadra nuk janë në nivelin e vitit të vjetshëm, kanë më shumë ide për të realizuar atë ëndërr. Është një kampionat që nuk dihet se kush e fiton deri në fund.
Të luash pa stres është diçka e madhe. Fati i tyre që edhe ekipet e mëposhtme nuk janë në formë. Më pëlqen mënyra sesi të kuqtë luajnë, por në momente vendimtare, e shikoj që po çalojnë. E vështirë të dalësh kampion, nëse në gjirin tënd nuk ke kampionë. Nuk e shikoj si skuadër agresive, e kam parë edhe ndeshjen e fituar me Vllazninë.
Vllaznia ka shansin e artë për të dalë kampion. Nuk po luajmë mirë. Gjithsesi, edhe kur nuk luan mirë, ka marrë pikë të rëndësishme. Unë jam i bindur se me kthimin e lojtarëve, ekipi do jetë shumë i fortë. Mendoj se Vllaznia do të bëhet edhe më e fortë. As futbollistët nuk janë në formën e duhur.
Teuta kaloi një periudhë tranzicioni. Disa lojtarë zhgënjyen. Mendoj se vërtetë janë në fund, por diferenca me ekipet lart nuk është e madhe. Nuk është alarmante”, përfundoi Edi Martini.
