Kryetari i Partisë Demokratike, Sali Berisha u shpreh këtë të Enjte se biznesi i vogël dhe i mesëm është rënduar nga rritja e taksave.
Nga foltorja e Kuvendit, Berisha i bëri apel kësaj kategorie të protestojnë.
“Nuk janë vetëm universitetet ato që janë në agoni. Biznesi i vogël është në agoni të vërtetë. Biznesi i mesëm është në arrati. Taksa që ju keni vendosur, 4-fishimi, 5-fishimi i energjisë. Taksa e re që keni parashikuar në 1 janar, 23% përbëjnë faktor shkatërrimtar për këtë biznes. Ndaj dhe e ftoj këtë biznes në një lëvizje të fuqishme kundër këtij regjimi dhe për përmbysjen e tij. Ftoj të gjitha profesionet e lira që njeriu i cili, firmos fap, fap, fap, e pam, pam, pam, mbush baulet me eurot e qytetarëve, kërkon ti largojë”, tha Berisha.
“Të bashkohemi në protestën e fuqishme e cila do ta bëjë të harrojë ato që ka thënë. E përmendi dje vettingun, sot u betua që nuk e kam thënë kurrë. Provoje po deshe vettingun. Të sfidojnë ata të sfidojmë dhe ne”, shtoi ai.
