Policia ka arrestuar këtë të Enjte administratorin e një Call center dhe një punonjëse (operatore), ndërsa është shpallur në kërkim pronari i subjektit.
Në njoftimin zyrtar të policisë bëhet me dije se S. N., 24 vjeç administrator dhe R. S., 25 vjeçe operatore mashtronin shtetas të huaj, nëpërmjet telefonit, për të investruar në bursa fiktive.
“Shpallet në kërkim pronari i subjektit të paregjistruar në organet tatimore. Sekuestrohen 9 njësi kompjuterike, aparate celulare dhe lista me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive. Specialistët e Seksionit për Hetimin e Krimeve Ekonomike dhe Financiare, në DVP Tiranë, nën drejtimin e Prokurorisë pranë Gjykatës së Shkallës së Parë Tiranë, pas një pune të mirëfilltë hetimore, organizuan dhe finalizuan me sukses operacionin policor të koduar “Last call 2”.
Si rezultat i këtij operacioni u bë arrestimi në flagrancë i shtetasve: S. N., 24 vjeç, banues në Tiranë, administrator i një subjekti call center; R. S., 25 vjeçe, banuese në Tiranë, e punësuar si operatore në këtë subjekt.Në vijim të veprimeve u shpall në kërkim pronari i këtij subjekti, shtetasi B. H., 36 vjeç, banues në Tiranë”, njofton policia.
Gjatë operacionit u sekuestruan në cilësinë e provës materiale 9 njësi kompjuterike, aparate celulare dhe lista me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive.
Vijon puna për dokumentimin e plotë të kësaj veprimtarie kriminale dhe kapjen e shtetasit B. H., ndërkohë materialet i kaluan Prokurorisë, për veprime të mëtejshme procedurale.
