“Krim të shëmtuar” e ka quajtur kryetari i Partisë Demokrati Sali Berisha vdekjen e Leart Kurtit brenda komisariatit të policisë.
Mëngjesin e sotëm gjatë një postimi në rrjetet sociale, Berisha shkruan se ky është një krim i banditëve me uniformë, të cilët e kanë torturuar shtazërisht të riun i cili ndërroi jetë.
Berisha shpreh ngushëllimet familjes të të ndierit dhe dënon me ashpërsi të madhe krimin e kryer sipas tij nga efektivët e Edi Ramës dhe ministrit Çuçi.
POSTIMI I PLOTE NGA SALI BERISHA:
KRIM I SHËMTUAR!
Banditë me uniformë i marrin jetën të riut 32 vjeçar, Leart Kurti. Ata e torturuan shtazërisht në makinën e policisë dhe e dërguan pa ndjeja në komisariat. Vrasësit me uniformë e dërgojnë të vdekur në urgjencë. Shpreh ngushëllimet më të ndjera familjes dhe dënoj me ashpërsinë më të madhe krimin e shëmtuar të kriminelëve me uniformë të Edi Ramës dhe ministrit të familjes Çuçi.
Lexoni denoncimin e qytetarit dixhital:
“Pershendetje Dr. Policia e droges i merr jeten nje tjeter te riu 32 vjecari i cili eshte ndjekur nga efektivet e droges me vrap dhe pasi e kane futur ne furgon me shume mundesi ai eshte goditur nga banditet me uniforme,ne momentin qe ka shkuar ke komisarjati nr 3 aty ai ka humbur ndjenjat. Sipas burimeve tona banditet qe i moren jeten djalit nuk lajmruam ambulancen sic e kerkon protokolli por e kane derguar me makinen e policise prane ambjenteve te Traumes! I riu quhet Laer Kurti!”
- Ngjarja, çfarë ndodhi mbrëmjen e djeshme sipas policisë:
Një ngjarje e rëndë ka ndodhur gjatë mbrëmjes së djeshme në Tiranë. Një i ri pasi është shoqëruar në komisariat, ka shfaqur probleme shëndetësore dhe për pasojë ka ndërruar jetë në spital, në shkaqe ende misterioze.
Ndalimi i shtetasit Laer Kurti, 32 vjeç u bë rreth orës 23:07, në rrugën “Riza Cuka”. Ndonëse të riut iu bë thirrje që të ndalonte, ai nuk iu bind policisë dhe tentoi të largohej, por u ndalua.
Uniformat blu bëjnë me dije se gjatë shoqërimit të tij, ky shtetas ka shfaqur probleme shëndetësore sapo ka mbërritur në ambientet e Komisariatit. Menjëherë është kërkuar ndihma e shërbimit të Urgjencës dhe për shkak se situata shëndetësore e tij është rënduar, i riu është dërguar me mjetet e Policisë në Spitalin e Traumës, ku edhe ka ndërruar jetë.
Agjencia e Mbikëqyrjes Policore, nën drejtimin e Prokurorisë ka ngritur menjëherë grupin hetimor, i cili po kryen veprimet e para hetimore për sqarimin e plotë të rrethanave të ngjarjes.
