Pas kryeministrit Edi Rama, edhe kryebashkiaku i Tiranës Erion Veliaj ka sulmuar protestën e pedagogëve.
Nga mbledhja e Këshillit Bashkiak, Veliaj e lidhi protestën e pedagogëve me Partinë Demokratike.
“Këto historitë e tipit: ‘Jemi të pavarur, s’jemi me asnjë parti’, kur në fakt ke qenë deputet i PD dhe ish drejtor i SHIK-ut të Gazidedes, janë me u tall keq me inteligjencën e miletit. Megjithatë, çdo SHIK-s i Gazidedes ka të drejtë të protestojë, jetojmë në një vend demokratik. Kush jemi ne të themi që ti s’ke të drejtë të protestosh? Çdo profesor, ish-deputet i “Foltores”, i gjumit, i mëngjezores, të gjithë kanë të drejtë të protestojnë se janë njerëz, në demokraci biem dakord që të mos biem dakord, është mëse normale. Por pyetja është: A është seriozisht ky momenti për këtë?”, tha Veliaj.
Madje, ai akuzoi akademikët që po mendojnë “për fundshpinën e tyre”, në një moment të vështirë.
“A është ky momenti? Kur të gjithë janë duke punuar si të ndihmojnë, si të kontribuojnë, si të solidarizohen? A është ky momenti kur ti thua unë do mendoj për fundshpinën time dhe dua rrogën time tani? Kjo nuk shkon! Në momentin që kemi profesorë që sillen në mënyrë të tillë, kjo është fyese. Fyen inteligjencën e shumë e shumë njerëzve”, tha ai.
Akademikët kanë lajmëruar se do të vijojnë protestat. Ata i kanë adresuar institucioneve shtetërore disa kërkesa, në qendër të së cilave është rritja 50 për qind e pagave bazë për pedagogët dhe stafet ndihmëse.
Nga ana tjetër, qeveria nuk i ka pranuar kërkesat e tyre dhe ka sulmuar protestat e pedagogëve.
