Kreu i grupit parlamentar të Partisë Socialiste, Taulant Balla thotë me bindje se nuk i trembet koalicionit mes Sali Berishës dhe Ilir Metës në zgjedhjet e ardhshme lokale.
Gjatë një deklarate për mediat nga kryesia e Kuvendit, Balla tha se PS do të synojë fitoren dhe në Shkodër, Balla nuk bëri asnjë koment rreth një aleance të mundshme të PS-së me Tom Doshin, i cili ditët e fundit është parë duke dalë nga zyrat e Kryeministrisë.
Pyetje: A i trembet Partia Socialiste një bashkimi të të gjithë forcave opozitare në vend?
“Në 2021 nuk ishin të gjithë bashkë? Bashkë ishin. Saliu, Ilir bashkë kanë qenë gjithmonë dhe kur Iliri ka qenë me ne. Nuk i është ndarë kurrë shpirti nga Saliu. PS ka një aleancë me njerëzit e zakonshëm të këtij vendi që do të jenë boshti i aleancës sonë. Ne do ta ruajmë këtë aleancë. Një prej politikave që duan apo s’duan kundërshtarët është një prej qëndrimeve më të njehsuara me atë që përfaqëson PS, politika për energjinë elektrike. Sot, cdo familje shqiptare, sheh që Shqipëria është ndër vendet e pakta, në mos i vetmi që nuk ka ndryshuar cmimin e energjisë elektrike për abonentët dhe familje që janë më në nevojë. Sot përfitojnë të gjithë”, tha Balla.
“Mjafton të shikoni zgjedhje e 6 marsit. Por në Shkodër e kanë kuptuar se nuk ka qenë zgjedhja më e mirë. PS në maj do të synojë fitoren edhe në bashkinë e Shkodrës” përfundoi Balla.
Opozita ka shprehur dakordësinë që në zgjedhjet lokale të 2023 të dalin më kandidatë të përbashkët. Berisha ka garantuar se kandidatët e opozitës së bshkuar do të dalin me modelin më demokratik, atë të “primareve” ku do të votojnë jo vetëm anëtarë të PD-së por edhe simpatizantë të saj.
