Të shtëna me armë kanë ndodhur në orët e para të mëngjesit të së premtes në Shkodër.
Sipas njoftimit të policisë, është qëlluar me armë zjarri në drejtim të makinës së një 42-vjeçari me iniciale A.B. Ky shtetas ka denoncuar ngjarjen në polici ndërsa nga të shtënat nuk ka persona të lënduar por vetëm dëme materiale ndaj makinës që ishte marrë me qira.
“Rreth orës 02:00, shtetasi A. B., 42 vjeç, banues në fshatin Mjedë, ka njoftuar sallën operative se në aksin rrugor “Shkodër-Vau i Dejës”, në rrugën e fshatit Vukatane, Shkodër, është qëlluar me armë zjarri në drejtim të automjetit tip “Toyota”, të cilin e kishte marrë me qira, duke shkaktuar vetëm dëme të vogla materiale”, njofton policia e Shkodrës.
Është ngritur menjëherë grupi hetimor dhe nën drejtimin e Prokurorisë pranë Gjykatës së Rrethit Gjyqësor Shkodër, vijon puna për zbardhjen e rrethanave të ngjarjes, identifikimin dhe kapjen e autorit/ve.
