Gjykata Administrative ka rrëzuar kërkesën e kolegjit “Mehmet Akif”, duke lënë në fuqi vendimin e qeverisë për mbylljen e tij.
‘Mehmet Akif’ kërkoi pezullimin e vendimit të qeverisë, por kërkesa u hodh poshtë nga Gjykata.
Vendimi i qeverisë ngarkon kolegjin që të mbulojë të gjitha shpenzimet për kryerjen e procedurave për transferimin e nxënësve. Gjithashtu në vendim, kolegjit i kërkohet që të kthejë pagesat e kryera nga prindërit për pjesën e papërfunduar të shkollimit.
Drejtuesit e kolegjit duhet të dorëzojnë në drejtorinë rajonale të arsimit gjithë dokumentet që kanë për aktivitetin arsimor.
Kjo kërkesë e qeverisë ka nxitur protesta të njëpasnjëshme të nxënësve të cilët nuk pranonin kolegj tjetër përvec “Mehmet Akif”.
Në tubimin-marshim nga Ministria e Arsimit drejt Kryeministrisë, ata i kërkuan qeverisë të anulojë vendimin. “Mbyll një shkollë, hap një derë burgu”, “Po godisni brezin e ardhshëm”, ishin disa nga pankartat e nxënësve, të cilët zbritën në shesh medaljet e marra, duke kërkuar t’u jepet zgjidhje për rrugën drejt dijes.
Në krahë të “Mehmet Akif” ka dalë dhe Komiteti Shqiptar i Helsinkit i cili i ka kërkuar qeverisë shqiptare që rishikojë vendimin për mbylljen e shkollës.
Përmes një deklarate për shtyp Komiteti Shqiptar i Helsinkit vlerëson se procedurat e autoriteteve nuk përmbushin standardet e procesit të rregullt dhe është dhënë një masë të ashpër, të nxituar, jo proporcionale dhe me pasoja të dëmshme.
“KShH vlerëson se në rastin e mbylljes së këtij institucioni arsimor privat para universitar, nuk janë respektuar standardet e procesit të rregullt që kërkon neni 42 i Kushtetutës së Republikës së Shqipërisë. Në vendimin nr. 25, datë 10.05.2021 të Gjykatës Kushtetuese theksohet se e drejta për proces të rregullt ligjor nuk kufizohet vetëm në procesin gjyqësor, por përfshin edhe atë me karakter administrativ. Njohja paraprake e personit me faktet që e ngarkojnë atë me përgjegjësi, respektimi i së drejtës për t’u dëgjuar dhe mbrojtur, nëpërmjet dhënies së sqarimeve paraprake, ashtu dhe gjatë shqyrtimit të çështjes, janë disa nga elementet bazë që garantojnë të drejtën kushtetuese të cilitdo për proces të rregullt ligjor”, thuhet ndër të tjera në reagimin e Komitetit të Helsinkit.
