Nga Boldnews.al
Në shumicën e vendeve perëndimore, ministrat e Financave janë më “koprracët”, me qëllim që të mbledhin buxhetin për ato qëllime jetike. Madje, u bëjnë rezistencë apo oponencë edhe presidentëve apo kryeministrave, nëse këtyre të fundit u merr “koka erë”.
Po në Shqipëri?! Natyrisht, kryeministrit tonë i ka marrë me kohë “koka erë”, pasi vetëm për një instalacion në ambientet e kryeministrisë po shpenzon 4 milionë euro. Madje, 6 milionë USD po shpenzon për satelitët dhe qindra milionë të tjera, ka filluar që t’i shpenzojë për pistën e Formula 1 në Elbasan.
Por, çfarë rezistence apo oponence i ka bërë Ministria e Financave, po ministrja Delina Ibrahimaj, kryeministrit? Deri më tani, nuk kemi parë apo lexuar ndonjë projekt të kthyer nga Ministria e Financave, me arsyetimin se “s’ka para’”. Përkundrazi, ka hapur thesin e buxhetit për qokat e Ramës por edhe të ministrave të tij. Dhe, të gjitha këto, në kurriz të taksapaguesëve shqiptarë.
Megjithatë, këtë “lojë” ka filluar ta ndjekë edhe Ibrahimaj, e cila për t’u mbyllur gojën mediave apo gazetarëve që të mos flasin për këto shpenzime, bën tendera qindra mijëra euro për fushata mediatike.
Fushata të njëjta me ato që bënë Inceneratorët, por vetëm se kësaj herë bëhen direkt nga Ibrahimaj. Sipas dokumenteve që disponon BoldNews.al, Ministria e Financave ka hapur një tender me procedurë “shërbim konsulence”. Bëhet fjalë për tenderin me objekt “fushatë mediatike për ndryshime ligjore në fushën fiskale”. Më tej shkruhet se paratë do të jepen për “shërbime të fushatës reklamuese”.
Fondi limit i akorduar nga Ibrahimaj është plot 37.500.000 lekë. Nëse do t’i shtosh edhe TVSH-në, shuma do të shkojë në plot 380 mijë euro. Një shumë e konsiderueshme, pasi bëhet fjalë për fushata mediatike, apo e thënë më shkoqur, blerjen e mediave për të mos folur për skandalet qeveritare.
Nëse një media merr një shumë të caktuar nga kjo “tortë”, si mund të bëjë artikuj apo kronika kundër ministrisë? Nëse deri dje këto media po bliheshin nga inceneratorët (edhe në atë rast paratë ishin të shqiptarëve), sot këto media po blihen drejtpërdrejt nga qeveria. Dhe, blerja ka filluar në vitin elektoral, ku vëmendja e mazhorancës është e madhe, pasi përballë do të ketë Berishën dhe Metën.
