Kryeministri Edi Rama foli për çmimin e energjisë elektrike këtë të Hënë gjatë një aktiviteti në Golem.
Rama pretendoi se mos rritjen e çmimit të energjisë elektrike dhe indeksimin e pagave të disa kategorive po lehtëson ekonominë e familjeve shqiptare.
“Vendet e tjera po rrisin faturat, të gjithë keni të njohur e miq në Itali. Mjafton t’i pyesni për stresin që kanë për shkak të rritjes së faturave të energjisë në tërësi. Kosova ka filluar kufizimet e energjisë dhe aplikimin e fashës. Ne po ndjekim një rrugë të guximshme, por edhe të rrezikshme. Për të kaluar rrezikun të gjithë duhet të kontribuojnë”, tha Rama.
“Sadopak në çdo kohë të ditës të kursehet, aq më shumë e garantojmë këtë rrugë. Kam bindjen se me rritjen e menjëhershme të pagave që ka hyrë në fuqi dhe që do jetë realitet në arkën e shumë familjeve, duke filluar që nga pensioni prapë do jetë kjo një lehtësi e ndjeshme në krahasim me inflacionin e luftës”, shtoi ai.
