Prej mëngjesit të sotëm nxënësit e shkollës “Mehmet Akif” kanë protestuar para Ministrisë së Arsimit pas vendimit të qeverisë për të mbyllur kolegjin turk.
Siç shihet dhe nga pamjet, të shumtë janë nxënës, prindër dhe përfaqësues të shkollës, që janë stacionuar para ministrisë më pas kanë marshuar në bulevardin “Dëshmorët e Kombit” për tu ndalur tek Kryeministria. Me thirrje të forta kundër qeverisë dhe banderola në duar, nxënëset i janë drejtuar Kryeministrisë, për të çuar zërin e tyre të protestës poshtë zyrës së Edi Ramë.
“Mbyll një shkollë, hap një derë burgu”,– brohorisnin nxënësit, të cilët u shprehën se ëndrrat e tyre janë prerë në mes, pas vendimit për mbylljen e gjimnazit.
Me pankarta dhe thirrje si: “mbyll një derë shkollë, hap një derë burgu’ apo ‘Po godisni brezin e ardhshëm’, protestueset ecën përgjatë rrugës së Durrësit, drejt Kryeministrisë, duke kundërshtuar kështu vendimin për mbylljen e kolegjit.
Gjithashtu nxënësit gjatë protestës kanë kërkuar ministres Evis Kushi që të japë dorëheqjen. Në debate lidhur me këtë vendim u përfshi edhe politika, ku opozita s’i kurseu akuzat për qeverinë, ndërkohë që Berisha iu bëri thirrje qytetarëve që t’i bashkohen protestës që po mban kolegji.
“Do të doja që cdo gjë të ishte makth por një realitet i hidhur. Kolegji na mësoi të mbështesim me përgjegjësi të drejtën, se ne mund të jemi një familje ku mund të ndajmë të njëjtat endrra, për të ngritur zërin përballë padrejtësive. Sot shteti po mbyll ëndrrat e një brezi, dogji shtëpinë tonë, hapi një plagë të pashërueshme për ne. Unë guxoj të flas e besoj të forca e fjalës, ne nuk kemi asgjë për të humbur ne jemi e ardhmja e vendit, humbja juaj jemi ne”- u shpreh një prej gjimnazisteve përballë Kryeministrisë.
