Shoferi i kryeinspektorit të ndërtimit të Tiranës, Mariglen Qato, i arrestuar si shpërndarës kokaine në sasi të mëdha, mund të lirohet me ndihmën e kryebashkiakut Erion Veliaj.
Alarmin e ngriti ish-kryeministri Sali Berisha, në një status në rrjete sociale pasditen e së shtunës.
“Boldnews.al” raportoi në mënyrë ekskluzive pak ditë më parë për arrestimin e Klaudio Malajt. Policia e arrestoi për shpërndarje kokaine në sasi të mëdha, si edhe për armëmbajte, pasi iu gjetën në shtëpi tre pistoleta pa leje.
Malaj u vendos në masë arresti në burg nga gjykata e Tiranës. Por, duket se shefat e tij po i bëjnë gati lirimin, siç shkruan Berisha.
Kryetari i Partisë Demokratike i referohet artikullit të “Boldnews.al”, ku jepen detaje mbi arrestimin e shoferit të Mariglen Qatos.
“Shoferi i Mariglen Qatos së Erion Djegësit, eksponent kryesor i mafies së ndërtimit në Tiranë, shpërndan kokainë. Por bosët e tij së shpejti do ta lirojnë”, shkruan Berisha.
