Policia e Tiranës nëpërmjet një reagimi zyrtar ka cituar emrat e deputetëve dhe protestuesve që kanë patur përleshje me policinë dhe si pasojë janë arrestuar. Sipas policisë protesta që Partia Demokratike zhvilloi këtë të hënë kundër parkut të lodrave tek Liqeni Artificial në Tiranë, ishte pa leje.
Deputetët që dhunuan policinë janë: Edi Paloka, Flamur Noka, Genc Pollo, Albana Vokshi, Arben Ristani, Asllan Dogjani, Keltis Kruja, Gerd Bogdani, Gent Strazimiri, shoqëruar nga protestues të tjerë, me veprime të dhunshme, tentuan dhe çanë me forcë kordonin e Policisë Bashkiake dhe të Policisë së Shtetit të vendosur në mbështetje të Policisë Bashkiake, duke hyrë brenda rrethimit të kantierit në ndërtim të “Këndit të Lojërave për Fëmijë”.
“Pjesa tjetër e protestuesve që ishin jashtë këtij rrethimi, vazhduan me veprime të dhunshme ndaj kordonit të policisë Bashkiake dhe të Policisë së Shtetit, duke kërkuar të bashkoheshin me pjesën e protestuesve dhe deputeteve që ndodheshin brenda rrethimit”, thotë policia.
Policia thotë se ka arrestuar në flagrancë 13 persona për dhunën e shfaqur në protestë, ne mesin e te cileve eshte edhe kryetari i PD-se ne njesine numer 5 ne Tirane, Ndricim Babasi.
- Grigels Muçollari
- Indrit Hoxha
- Erjon Dizdari
- Franci Doka
- Gerald Metko
- Silvio Sheme
- Jurgen Kupi
- Soven Sheme
- Arlind Kajo
- Klejdi Kalaja
- Ndriçim Babasi
- Behar Hasa
- Tonin Kolthi
Personat janë arrestuar ne flagrance për veprat penale “Organizimi dhe në grumbullime e manifestime të paligjshme”, “Shkatërrimi i pronës”, “Kundërshtim i punonjësit që kryen një detyrë shtetërore ose një shërbim publik” dhe “Prishja e qetësisë publike”.
Sipas policisë, 3 efektive të policisë Bashkiake, u dëmtuan nga protestuesit dhe morën trajtim mjekësor në Spitalin e Traumës.
