Me ton dhe gjuhë të ashpër foli këtë të Hënë kryetari i Partisë së Lirisë Ilir Meta, për kryeministrin Edi Rama.
Në emisionin televiziv “Të Paekspozuarit”, Meta tha se Rama është “një legen”. Ish-Presidenti theksoi se Edi Rama do dalë nga politika si “kurban i Ilir Metës”.
“Ky (Edi Rama) është një legen, ai e di shumë mirë që është një legen. Ai erdhi në politikë si çuni i Netës, çun i mamit, dhe do dali nga politika si kurban i Metës”, tha kreu i Partisë së Lirisë.
Më tej, e quajti kryeministrin Rama “armik të shqiptarëve”, “të mbaruar” dhe “të droguar”, ndërsa shtoi se pushteti i Ramës rrjedh nga “blerja” e Lulzim Bashës.
Meta u shpreh se “rruga e protestave, e ngritjes së qytetarëve, është ajo që do të rivendosë Shqipërinë në normalitet, pasi ai i ka kapur të gjitha institucionet, parlamenti është jo-funksional. Drejtësia është në një presion të vazhdueshëm”.
“Unë e kam thënë përpara që ky lloj regjimi do të rrëzohet me protesta dhe zgjedhje, një kombinim i të dyjave. Ne nuk do të heqim dorë nga institucionet, do të bëjmë maksimumin në parlament, por kjo nuk do të jetë rruga e vetme që mund të imponojë një ndryshim. Kështu që protesta është domosdoshmëri e jashtëzakonshme”, tha Meta.
