Bayern Munich i ka bërë blerjet e tij të mëdha sivjet, duke alternuar eksperiencën e Sadio Manesë, që ka marrë vendin e Robert Lewandowskit, por në të njëjtën kohë edhe tri goditje fenomenale për të ardhmen si mbrojtësit Matajs de Ligt (22 vjeç nga Juventusi) e Nusa Mazrui (24 vjeç nga Ajaksi), ashtu sikurse mesfushorin 20- vjeçar Rajan Gravenberk nga Ajaksi.
Gjithsesi, sivjet nuk pritet që të jetë një sezon i lehtë, duke marrë parasysh se kampionati do të ndahet përgjysmë, si rrjedhojë e Botërorit të Katarit mes muajve nëntor-dhjetor, në Mynih duan që të kenë sa më shumë alternativa në skuadër, duke parë se dëmtimet mund të bëjnë jo pak dëme mes javëve dhe muajve të ardhshëm, si rrjedhojë edhe e kalendarit të ngjeshur.
Gjithsesi, pas më shumë se 120 milionë eurove shpenzime të bëra këtë verë, në radhët e kampionëve të Gjermanisë nuk duan që të fusin më dorën në xhep, pasi ideja e drejtorit sportiv, Hasan Salihamixhiç, është studimi dhe vlerësimi i disa prej futbollistëve të luksit të mbetur pa kontratë. Mes tyre ka emra të mëdhenj, kampionë të çdo reparti dhe mes tyre “Brazo” ka listuar 9 futbollistë. Lista në fjalë është zbardhur nga “TZ”, e cila raporton se bisedime të ndryshme kanë nisur me lojtarë si Andrea Beloti, bomberi italian që u largua nga Torino; mbrojtësi i majtë brazilian Marselo, pas lamtumirës nga Reali i Madridit; kosovari i natyralizuar belg, Adnan Januzaj, por edhe të tjerë që sigurisht mund të ishin zëvendësues idealë dhe përforcime të rëndësishme në radhët e Bajernit.
Ndoshta, nga lista e Salihamixhiçit duket se do të fshihet shpejt një emër, duke qenë se mediat në Spanjë dhe në Europë nënvizojnë se Edinson Kavani është fare pranë arritjes së marrëveshjes me Valencian e stërvitur nga Xhenaro Gatuzo, ndonëse sërish mes të përzgjedhurve ka mbetur material interesant dhe për t’u vlerësuar pse jo së bashku edhe me kërkesat e trajnerit Julian Nagelsman.
