Nga Boldnews.al
Erion Veliaj arriti të barazohet me Elisa Spiropalin në rrafshin ndërkombëtar-realizoi një foto duke shtrënguar duart në Kiev me presidentin e Ukrainës, Vlodimir Zelenski.
Veliaj ishte “figurant” në një delegacion të Shoqatës së Kryebashkiakëve Europianë, “Eurocities”, gjatë një takimi të zhvilluar këtë fundjavë në kryeqytetin ukrainas.
Kreu i këtij organizmi europian, njëkohësisht edhe kryebashkiak i Firences, Dario Nardela, nënshkroi një Marrëveshje Politike me Shefin e Administratës së Presidencës së Ukrainës, Andriy Yermak, për mbështetjen në rindërtimin e qyteteve ukrainase të shkatërruara nga pushtimi rus.
Nardella shoqërohej në këtë takim nga kryetarët e bashkive të Athinës, Helsinkit, Lionit, Marsejës, Oslos, Rigës dhe Tiranës.
Në njoftimin zyrtar për këtë takim, “Eurocities” nuk citohen emrat e asnjë prej anëtarëve të delegacionit, duke treguar përulësi personale për çdo kryebashkiak dhe duke i dhënë rëndësinë Shoqatës ndërkombëtare.
Por, kjo vizitë ishte një moment që duhej kapur në ajër nga “spin-doctorët” e Erion Veliaj.
Në ndihmë i vijnë, si përherë, tabori mediatik që ushqehet me lejet e ndërtimit dhe favoret e tjera nga zyrtari më i lartë i kryeqytetit shqiptar.
Gjatë kësaj fundjave, megafonët mediatike e shfaqin Veliaj duke diskutuar me Zelenskin për programet e rindërtimit të Ukrainës, pasi të përfundojë pushtimi rus.
Ose duke buzëqeshur me “mikun” Vladimir Klitçko, ish-boksieri ndërkombëtar që tashmë është kryebashkiak i Kievit.
Pra, gjithçka e gatuar nga kuzhina mediatike e shfaq Erion Veliaj si një “lider global”. Por, natyrisht, në servilizmin e tij, Veliaj nuk duhet të kalojë “liderin global” të vërtetë në Shqipëri, Edi Ramën.
Për shefin e tij politik, Veliaj ka një falënderim të veçantë për mbështetjen që po i jep Ukrainës në Këshillin e Sigurimit të Kombeve të Bashkuara.
“Takim i shkëqyer në Kiev me Presidentin e Ukrainës, Zelenski. Mirënjohës Edi Ramës për mbështjen që jep në Këshillin e Sigurimit të OKB-së, mbështetjen për refugjatës dhe të gjithë ndihmat e tjera”, shkruan Velian në Twitter.
Vizita e Veliajt në Kiev nuk kishte asnjë lidhje me Edi Ramën. Ai bleu dy bileta vajtje-ardhje Tiranë-Varshavë dhe më tej drejt Kievit me tren, të gjitha të paguara nga taksat e qytetarëve të Tiranës dhe për llogari të Shoqatës së Kryebashkiakëve Europianë.
Më tej, në postimin në rrjete sociale, Veliaj vazhdon: “Tirana është qytet-motër me Kharkivin dhe ne jemi të angazhuar të rindërtojmë shkolla dhe të ndajmë ekspertizën tonë në projektet e rindërtimit”.
Natyrisht, kjo deklaratë e Veliajt nuk kishte si të mos ngjallte revoltën dhe ironinë në rrjete sociale, ku qytetarët i rikujtojnë kryebashkiakut të Tiranës se prej tre vitesh nuk ka arritur të rindërtojë asnjë pallat për mijëra banorët e dëmtuar nga tërmeti i 26 nëntorit 2019.
Gjithësesi, ai e arriti qëllimin e tij-u barazua me Ministren e Shtetit, Elisa Spiropali, e cila u bë lajm gjatë një vizite në Kiev ku shoqëronte Ramën, vetëm për faktin që ndërroi tre kostume të shtrenjta në pak orë vizitë në shtetin e përfshirë nga konflikt i përgjakshëm ushtarak
