Një vajzë 7 vjeçare, e cila pushonte me familjen e saj në Potam të Himarës, humbi jetën sot pasi u godit për vdekje nga një skaf që drejtohej nga një komisar policie, Arjan Tase. Ky i fundit, me detyrë në Komisariatin e Elbasanit, kishte shkuar me pushime në Himarë, atje ku skafi me të cilin bënte shëtitje në det, goditi në breg vajzën 7 vjeçare.
Ngjarja e rëndë ka ndodhur në një kohë kur në drejtim të strukturave policore ishte dhënë një urdhër nga Drejtori i Përgjithshëm i Policisë së Shtetit, Gledis Nano, për të shtuar masat e sigurisë ndaj pushuesve.
Duket se urdhëri i Kryepolicit ka mbetur rrugës, kur një komisar policie, duke drejtuar një skaf, godet për vdekje një vajzë 7 vjeçare, familja e së cilës kishte zgjedhur të udhëtonte nga Anglia, atje ku ishin emigrantë për të kaluar pushimet në bregdetin shqiptar.
Fotot e mëposhtme tregojnë momentet kur policia kufitare nis patrullimin e bregdetit në Himarë. Por fatkeqësisht kufitarët kanë dalë për kontrolle ose xhiro pas tragjedisë. Kjo është hera e parë, sipas banorëve të zonës, që një skaf i Policisë Kufitare, del për të inspektuar bregdetin e Himarës. Dhe ndoshta kjo është arsyeja që me urdhër të Gledis Nano u pezullua nga detyra shefi i Policisë Kufitare të Vlorës, Shpëtim Hasanaliaj.
