Nëse e keni pasur të vështirë të kuptonit se nga buron urrejtja dhe shqetësimi i kryeministrit Edi Rama ndaj portaleve, sot keni rastin më të mirë për ta mësuar.
Një monitorim elementar i 5 televizioneve informative rreth orës 14:00 të së premtes, zbulon se si këto 5 televizione janë kthyer tërësisht në marioneta të zyrës propagandistike të kryeministrit.
Të pesta televizionet po transmetonin një fjalim mediokër dhe të allakatur të Ramës në konferencën e radhës me temë ‘minoritetet’.
Por televizionet ndërsa kanë zgjedhur të bombardojnë teleshikuesit me mesazhet e lodhshme të kryeministrit mbi temën e minoriteteve (të stërthëna prej vitesh), paralelisht i kanë bërë një shërbim të çmuar atij.
Sepse konferenca e minoriteteve ka fshehur nga ekranet protestën e marshuesve të Zharrzës, të cilët mbërritën në Tiranë për të protestuar kundër dëmtimit të shtëpive të tyre nga operacionet hidrokarbure të realizuara prej korporatës ‘Bankers Petroleum’.
Mes televizioneve është dhe ABC News e cila është rreshtuar në korin e propagandës së Ramës. / Hashtag.al
