Prokuroria e Durrësit merr te pandehur Petrit Fushën, ish-drejtuesin e Prokurorisë së Tiranës.
Ish-prokurori akuzohet për veprën penale: “Refuzim për deklarimin, mosdeklarimi, fshehja ose deklarimi i rremë, i pasurive të personave të zgjedhur dhe nëpunsëve publik, ose i çdo personi që ka detyrim ligjor për deklarim”.
“Shtetasi Petrit Fusha, ka qenë me detyrën e prokurorit dhe në bazë të ligjit i është nënshtruar procesit të rivlerisimit. Nga Komisioni i Pavarur i Kualifikimit, është dërguar në Prokurorinë pranë Gjykatës së Shkallës së Parë për Krime të Rënda Tiranë, raporti me rezultatin përfundimtar të hetimit administrativ për ish-prokurorin Petrit Fusha, ku kërkohet të hetohet për faktet në kuadër të rivlerësimit kalimtar. Ky fakt ka shërbyer për regjistrimin e çështjes penale, në ngarkim të tij dhe më pas ka sjellë marjen e tij me cilesinë e të pandehurit”, sqaron Prokuroria e Durrësit.
“Nga hetimi i çështjes, rezulton së shtetasi Petrit Fusha, në deklaratat periodike vjetore dhe gjatë procesit të rivlerësimit, ka deklaruar rrethana të rreme në lidhje me pasuritë që ai disponon dhe që kishte në pronesi, për mënyrën e fitimit të pronësisë mbi këto objekte dhe sipërfaqe toke, si dhe ka kryer veprime fiktive në lidhje me dhënien me qira të disa objekteve në pronësi të tij, pasi ka rezultuar se qiramarrësit nuk kanë patur aftësi financiare për të paguar të ardhurat nga qiraja si dhe shetasi Petrit Fusha nuk ka deklaruar shpenzime të kryera në lojërat e fatit gjatë viteve 2010 deri në 2016, shpenzime që kapin vlera të konsiderueshme financiare”, thuhet më tej në një njoftim të prokurorisë.
Ish-drejtuesi i Prokurorisë së Tiranës dha dorëheqjen në Shkurt pasi u njoh me rezultatet e hetimit 1-vjeçar kundër tij nga Komisioni i Pavarur i Kualifikimit, duke i kursyer vetes ballafaqimin me barrën e provës. Komisioni i Pavarur i Kualifikimit e nisi procesin e vetingut për Petrit Fushën në Janar të vitit 2018 dhe e përfundoi hetimin kryesisht në Shkurt 2019.
Petrit Fusha ka ushtruar detyrën e prokurorit nga viti 1997 deri më 28 shkurt 2019, kur vendosi të largohej me dorëheqje nga sistemi. Ai ka punuar në prokurorinë e Tiranës për një periudhë 15-vjeçare dhe u emërua drejtues i kësaj prokurorie në vitin 2013. Në vitin 2017, Fusha u transferua në Prokurorinë e Përgjithshme.
Petrit Fusha është akuzuar nga opozita për lidhje të forta me kryebashkiakun e Tiranës Erion Veliaj. Në qendër të akuzave kanë qenë tenderat e dyshimtë të lidhur me Bashkinë e drejtuar nga Veliaj nga firma “Fusha SH.P.K.” me pronar vëllain e ish-prokurorit Shkëlqim Fusha.
Akuza ka pasur edhe për rastin e vdekjes së Ardit Gjoklajt. Për çështjen u akuzua kryebashkiaku i Tiranës Erion Veliaj, ndërsa Petrit Fusha ishte prokurori që mbylli dosjen.
