Kreu i Partisë së Lirisë, Ilir Meta mohoi në mënyrë kategorike se është ai “Ilir Metaj” – personi për të cilin Autoriteti i Dosjeve flet se është në dosjen e ish-Sigurimit të Shtetit.
Autoritetin e Dosjeve e quajti “Autoriteti i Manipulimit dhe Kriminalizimit të Dosjeve”. Sipas tij, manipulimi i çështjes po bëhet për llogari të Ramës për të hequr vëmendjen nga skandali i inceneratorëve dhe aferat e tjera qeveritare.
“Sa I.M. ka qenë në fakultetin e Ekonomisë, sa kanë qenë në klasën ku kam qenë unë, kush ka qenë? Unë kam qenë sekretar i rinisë i Fakultetit të Ekonomisë. Isha zgjedhur se i kisha 10-ta të tëra, por edhe se isha lider që atëherë. Bëja organizimet e të tjera. Unë njof nja 40, 50 Ilir Metaj, që njof unë, njërin e keni dhe në Kuvend. Në klasën time kemi qenë dy. Dhe na e bënin Ilir Repexh Meta dhe Ilir tjetër që jam i sigurt që edhe ai s’ka qenë. Autoriteti i Manipulimit të dosjeve ka një përgjegjësi të madhe se për llogari të Ramës shkatërron besimin e tij në publik”, theksoi ish-kreu i shtetit në një deklaratë për shtyp pas mbledhjes së Komitetit Organizativ të Partisë së Lirisë në përgjigje të interesit të gazetarëve për çështjen.
“Ilir Meta është këtu pas 30 viteve politikë se do jetë gjithë i pastër në të vërtetat e tij dhe jo vetëm kaq por do vazhdojë dhe nja 30-40 vite të tjera. Ëndrra ime është të bëhem sa më parë kryetari i referendumit. Një kryeministër del kundër popullit, shtypet butoni i referendumit dhe fap, ikën”, u shpreh ai.
Reagimin e autoritetit, Meta e quajti po ashtu një akt vetëvrasës.
“Po si mund ti shmangem një përgjigje pavarësisht se s’ka shqiptarë në këtë tokë qe se kupton që me këtë akt vetëvrasës se autoriteti para se te jete autoritet ligjor është moral. Se ty te është besuar të tregosh të kaluarën e dhimbshme të popullit shqiptar dhe personat që janë prekur në mënyrë të vullnetshme dhe që kërkojnë ti shpëtojnë filtrit dhe njëkohësisht edhe të ngushëllosh viktimat, të prekurit që kishin ato pasoja nga sigurimi dhe bashkëpunëtorët e tyre. Kjo është vetëm për të ardhur keq për autoritetin e manipulimit dhe kriminalizimit të dosjeve. Ata e dine se çfarë ka, çfarë s’ka dhe sa e manipuluar është në ato dosje që thonë ata. Me një e-mail anonim na qenka zbuluar se na qënka një I.M. që sipas disa lojërave të qëllimshme nga parlamenti dhe mediat e inceneratoreve, pra u zbulua që pas 30 e ca vjetësh I.M. qenka ky njeri i cili që në mars 92 është bërë deputet dhe i është nënshtruar gjithë filtrave e gjithë instucioneve të të gjitha kohërave. Që nga koha e zotit Berisha që se kaluan gjysma e asaj partie që sot janë shndërruar në parti fuksash e patronazhistësh e gjithë komisionet e kohërave të tjera, nga Fatos Nano e deri te ky i sotmi. Çfarë i ka kushtuar autoritetit ta thërriste këtë person që ka emër: Ilir Rexhep Metaj, që ka babë. A ka njeri që e beson këtë gjë?!”, u shpreh Ilir Meta.
Akuza lëshoi dhe ndaj kryetares së parlamentit Lindita Nikolla, e cila njoftoi gatishmërinë për mbledhjen e Kuvendit, pas një kërkese të Autoritetit të Dosjeve për këtë çështje. Ai e quajti Nikollën “një pulë” e cila sipas tij po lejon të përdoret nga kryeministri Edi Rama. Ky i fundit, tha Meta, është i interesuari pas këtij manipulimi. Ramën e quajti edhe të “sëmurë psiqik”.
“Dhe pastaj u ngrit parlamenti në këmbë, parlamenti me në krye zonjën Nikolla apo Lindita e Ramës që përdoret për urgjenca, për të zbehur vëmendjen nga afera e inceratorëve ku do përfundojnë si minjtë dhe nga të gjitha aferat e tjera të zeza përfshirë dhe çështjen që i kam dërguar një letër parlamentit para se të lija detyrën e presidentit. Për atë nuk mblidhet parlamenti, se është parlament i korruptuar dhe plot me lulushë nga opozita”, tha Meta.
Ai paralajmëroi se manipulimi nga autoriteti do të zbardhet.
“Ju do ta shikoni si do të përfundojë. Nuk ekziston më për mua Autoriteti i Dosjeve është autoriteti i manipulimit dhe kriminalizimit të dosjeve. Emrat e tyre do të gdhenden në shtyllën e turpit sepse për një çështje kaq delikate që ka të bëjë me të kaluarën për nevoja personale të një të marri, të sëmuri psiqik dhe atyre deleve të parlamentit”, tha Meta.
Lexo edhe:
Partia e Lirisë: Autoriteti i Dosjeve nuk i ka dorëzuar Metës kurrë vendim
