Në kohën kur dhjetra grevistë, banorë të Zharrëzës janë nisur në këmbë drejt Tiranës, publikohet një raport tronditës, që mban datën 31 janar dhe ku thuhet se në harkun tre mujor fshati ka përjetuar 2.766 lëkundje të tokës.
Këto të dhëna u publikuan dje në një takim në Bashkinë e Patosit, ku merrnin pjesë përfaqësues vendor dhe zv. ministri i energjisë Ilir Bejtja.
Në fjalën e saj kryetarja e Bashkisë së Patosit, Rajmonda Balili, u shpreh se tashmë ka përfunduar faza e verifikimit në terren të banesave të dëmtuara dhe po përgatitet fatura e kostos financiare për dëmshpërblimet e 500 banesave.
Në raportin që mban firmat e zv.kryeministrit Niko Peleshi, zv.ministrave Bejtja dhe Çipa, si dhe të ekspertëve të Ministrisë së Energjisë, Ministrisë së Mjedisit dhe të Avokaturës së Shtetit, thuhet ndër të tjera se, pas pezullimit të procesit të injektimit të ujit teknologjik në puset gëlqerore, është vënë re se janë minimizuar lëkundjet e tokës në zonën e Zharrëzës.
Sipas raportit në qoftë se nga 24 shtatori deri më 27 dhjetor 2016 janë regjistruar gjithsej 2.766 ngjarje sizmike, në periudhën e mbikëqyrjes së procesit nga ekspertët u vunë re vetëm 3- 4 lëkundje të lehta në ditë.
Bazuar në këto të dhëna është dalë në përfundimin se pikërisht aktiviteti i “Bankers Petrolium” ka shkaktuar lëkundjet e tokës.
