Haxhire Gurakuqi, e moshuara që rezulton në letra pronare e një prej kompanive me të cilën bizneset e inceneratorëve kanë kryer evazion fiskal, ka folur për Fax News mbi përjetimet e saj, pas lajmit të dalë në media.
Ajo tregon se deri tani nuk është marrë në pyetje nga SPAK, dhe shprehet se asnjë nga insitucionet nuk është interesuar për të.
“Askush nuk ka ardhur që të interesohet për mua, përveç gazetarëve. Që kur kam dëgjuar ngjarjen ndihem e frikësuar, qeveritarët e kanë bërë këtë punë, kush tjetër”, shprehet e moshuara për Fax News.
Pyetje: Ju rezultoni të jeni pronare e një kompanie, keni dijeni për këtë gjë?
“Jo moj çupë, nuk kam qenë në dijeni. Unë kur ngela rrugëve, kam fjetur në një ambient ku ishin vetëm 4 shtylla. Dhe kur fleja atje, një drejtoreshë shkolle u bënë thirrje nxënësve për të më ndihmuar. Kisha një sasi lekësh dhe atje ku flija, unë i mbuloja me dhe natën se thoja do vijnë të mi marrin sepse nuk kishte as dyer dhe as dritare.
Më pas kur vijë këtu, lekët i pata futur në bankë. Pas ca kohësh shkoj të marr lekët, vetëm kur më thonë se mi kishin bllokuar tatimet se isha biznesmene dhe nuk kisha bllokuar tatimet. Qeshën dhe shoqet e mia. I pyeta ku qenkam biznesmene, më thanë në Lezhë. Po unë as rrugën për Lezhë nuk e di.
Qeveritarët, do e kenë bërë. Pse si i dini qeveritarët, si të kulluar? Unë kam firmosur një letër të bardhë që e kishin dy persona që u prezantuan si të prokurorisë kur erdhën këtu. Drejtori ma bëri i shkreti me shenjë, por ishte tepër vonë.
Nuk më treguan se për çfarë u duhej firma ime, nuk i pyeta se e dija se ishin të prokurorisë jo që ishin maskarenj”, u shpreh zonja Haxhire Gurakuqi.
