Dy viktima dhe tre të plagosur është bilanci i një përplasjeje me armë që ndodhi mbrëmjen e së shtunës në Athinë.
Nga raportimet mësohet se në ngjarjen e rëndë është i përfshirë edhe një shqiptar. Mediat greke raportojnë se përplasja e dy makinave, në njërën prej të cilave ndodhej një shqiptar, u pasua me të shtëna armësh.
Mediat raportojnë se rreth orës 21:30 të së shtunës nisën të shtënat.
Pas aksidentit, pasagjeri i mjetit tip “Mercedes” ka kapur armën dhe ka qëlluar dy personat e tjerë të automjetit me të cilin ka ndodhur përplasja, duke plagosur drejtuesin dhe pasagjerin.
Të dy u dërguan në spitalin “Pammakaristos”, ku drejtuesi i mjetit ndërroi jetë.
Pas incidentit me të shtëna në rrugën Kourtidou, pasagjeri i Mercedesit që ka qëlluar ka zbritur nga makina dhe ka vjedhur një “Yaris”, me të cilin është nisur drejt Agioi Anargyros. Atje ai shkoi në këmbë në një pikë karburanti ku edhe u pikas nga policia.
Kur pa efektivët, sipas raportimeve, shqiptari nisi të qëllonte drejt tyre duke plagosur dy efektivët e policisë, njëri në këmbë dhe tjetri në gjoks.
Policia i është kundërpërgjigjur zjarrit dhe shqiptari ka gjetur vdekjen, Mediat greke e kanë cilësuar Athinën e kësaj të shtune si “Çikagon e viteve ’30”, për shkak të incidenteve të shumëfishta në rrugët e kryeqytetit që patën si protagonist shtetasin shqiptar.
