Aktivisti Ervin Goci ka hedhur poshtë pretendimet se pjesëmarrësit në protestat kundër qeverisë mund të konsiderohen agjentë të infiltruar, duke argumentuar se vetë natyra e një agjenti është të veprojë në fshehtësi dhe jo të dalë publikisht në protesta.
Në një lidhje të drejtpërdrejtë për emisionin “Now me Erla Mëhillin”, Goci u shpreh se qytetarët që protestojnë hapur, me identitetin e tyre, nuk mund të etiketohen si agjentë, pasi sipas tij ata po ushtrojnë një të drejtë kushtetuese.
Ai theksoi se mijëra qytetarë kanë dalë në protestë me një kërkesë të qartë politike: dorëheqjen e kryeministrit Edi Rama, si dhe garantimin e më shumë demokracisë, lirive dhe të drejtave qytetare.
Duke komentuar debatet e krijuara pas shpalljes “non grata” të Ikballe Hudutit, Goci tha se çdo dyshim për ndikime të jashtme apo infiltrime duhet të hetohet nga institucionet kompetente dhe jo të shndërrohet në një debat të pakontrolluar në rrjetet sociale.
Sipas tij, protesta nuk ka si synim cenimin e rendit kushtetues, por është një reagim qytetar ndaj situatës politike në vend. Ai shtoi se nuk do të merrte pjesë në një tubim që synon destabilizimin e institucioneve, duke nënvizuar se pjesëmarrësit kanë treguar përgjegjësi dhe sjellje paqësore gjatë protestave.
Në fund të deklaratës së tij, Goci kritikoi kryeministrin Rama, duke e akuzuar se po përdor narrativa konspirative për të shmangur përgjegjësinë politike. Sipas aktivistit, zgjidhja e vetme që protestuesit kanë kërkuar vazhdimisht mbetet largimi i kryeministrit nga detyra.
