Policia ka reaguar pas operacionit të zhvilluar në fshatin Zallë, Krujë, për kapjen e shtetasit të shumëkërkuar Ylli Zalla.
Në operacion morën pjesë DVP Tiranë, Komisariati i Policisë Krujë dhe Forcat Speciale “RENEA”.
Policia thotë se gjatë ndërhyrjes, i shumëkërkuari, sapo ka konstatuar shërbimet e Policisë, ka mundur të largohet duke u futur në pyll dhe ka përfituar nga errësira për t’u arratisur.
Në banesën e tij, shërbimet e Policisë kanë gjetur dhe arrestuar shtetasin F. A., 55 vjeç, banues në të njëjtin fshat, i dyshuar për veprat penale “Përkrahja e autorit të krimit” dhe “Moskallëzimi i krimit”. Ky shtetas dyshohet se ka njoftuar dhe ndihmuar Ylli Zallën për t’u larguar nga banesa.
Gjatë kontrollit, Policia gjeti dhe sekuestroi një armë zjarri pistoletë me fishekë në fole gati për qitje, një celular që dyshohet se i përkiste të shumëkërkuarit, municion luftarak dhe një detektor frekuencash.
Në banesë u gjet edhe vëllai i Ylli Zallës, shtetasi E. Z., 35 vjeç, i shpallur më herët në kërkim nga DVP Lezhë, i cili do të ndiqet në gjendje të lirë si i dyshuar për bashkëpunim në ngjarjen e datës 10.06.2026, ku shpërtheu një sasi lënde plasëse në një ambient të hapur.
Policia bën me dije se vijon intensivisht puna për kapjen e shtetasit Ylli Zalla, ndërsa materialet procedurale i janë referuar Prokurorisë për veprime të mëtejshme.
