Një shtetas shqiptar, i shpallur në kërkim ndërkombëtar nga autoritetet italiane, është arrestuar ditët e fundit në Mançester të Mbretërisë së Bashkuar, pas disa muajsh arrati.
Sipas njoftimit të Guarda di Financa Bergamo, i arrestuari konsiderohet një nga drejtuesit e një organizate kriminale italo-shqiptare që vepronte në disa rajone të Italisë, përfshirë Lombardinë, Emilia-Romagnën, Toskanën, Lazion dhe Kalabrinë.
Grupi kriminal akuzohet për trafik të lëndëve narkotike, vjedhje dhe grabitje në vila, shfrytëzim prostitucioni, zhvatje, pastrim dhe fshehje të pasurive me origjinë kriminale, falimentim mashtrues dhe armëmbajtje pa leje.
Autoritetet italiane kishin zhvilluar një operacion të gjerë në maj 2025, gjatë të cilit u arrestuan 12 persona. Megjithatë, shqiptari i shumëkërkuar arriti t’i shpëtonte arrestimit, duke bërë që Prokuroria e Bergamos të lëshonte ndaj tij një ‘Mandat Evropian Arresti’.
Pas hetimeve dhe bashkëpunimit ndërkombëtar mes autoriteteve italiane dhe britanike, u zbulua se ai fshihej në Mançester. Grupet speciale të policisë britanike ndërhynë në banesën ku ishte strehuar dhe e vunë në pranga.
Aktualisht, ai ndodhet në paraburgim në Mbretërinë e Bashkuar dhe pritet të ekstradohet në Itali.
Hetimi që çoi në arrestimin e tij mundësoi sekuestrimin e pasurive me vlerë rreth 1.2 milionë euro, 500 mijë euro cash të fshehura në automjete, rreth 25 kilogramë kokainë dhe hashash, si dhe një automjet luksoz Mercedes Limousine VIP me vlerë rreth 200 mijë euro, i përdorur sipas hetuesve për aktivitetet e paligjshme të organizatës.
Sipas burimeve (konfidenciale) Shqiptari i arrestuar ne Manchester është i datëlindjes 1988 me inicialet P. Y.
Operacioni i majit të 2025 që e vuri nën masë arresti dhe e shpalli në kërkim nga Europol ishte koduar me emrin “Money road”.
