Kryetari i grupit parlamentar të Partisë Demokratike, Gazment Bardhi, ka reaguar pas votimit në Parlamentin Europian të rezolutës për Shqipërinë, ku u miratua një amendament që kërkon shfuqizimin e ligjit për zonat e mbrojtura.
Në një postim në Facebook, Bardhi u shpreh se “Parlamenti Evropian flet me një zë të unifikuar me qytetarët shqiptarë që protestojnë prej ditësh: të shfuqizohen dispozitat e papajtueshme të Ligjit të ndryshuar për Zonat e Mbrojtura, në përputhje me kërkesën e kahershme të Komisionit dhe Parlamentit Evropian, si dhe me kriteret përmbyllëse të Kapitullit 27”.
Ai akuzoi kryeministrin Edi Rama se “bën sikur nuk di të lexojë” dhe se ka humbur sensin e të kuptuarit.
Bardhi shtoi se Rama ka vetëm një detyrë: të dëgjojë zërin e eurodeputetëve dhe të shfuqizojë ndryshimet në ligjin për zonat e mbrojtura. “Projektligji është depozituar prej nesh në Kuvend prej një muaji dhe pret votën e deputetëve”, theksoi ai.
