Ndërsa qindra të rinj vijojnë të ngrejnë zërin në protesta kundër korrupsionit, mungesës së meritokracisë dhe mungesës së mundësive për të ndërtuar të ardhmen, deputeti i Partisë Socialiste, Erion Malaj, ka reaguar duke theksuar nevojën për durim.
I ftuar në emisionin “A2 CNN”, Malaj e konsideroi të tepruar që një e re e sapodiplomuar të shfaqë mosbesim ndaj jetës profesionale pa hyrë ende në tregun e punës, duke shtuar se vështirësi hasen nga të rinjtë në të gjitha vendet.
“Më duket pak e tepruar që një e re që ka mbaruar studimet Bachelor, pa dalë akoma në jetën e saj profesionale, të ketë këtë mosbesim dhe këtë qasje ndaj asaj që nuk e ka provuar ende, që është dalja në punë.
Gjithsesi, mund të ketë profesione të caktuara ku ajo gjykon që has vështirësi, por nuk mendoj që qasja duhet të jetë kjo, pasi edhe ne që jemi këtu nuk na ka falur njeri gjë, por gjithsecili me vështirësitë e veta ka ecur përpara”, u shpreh Malaj.
Ai shtoi se ka përvojë të gjatë në fushën akademike, duke kujtuar se ka qenë për rreth 10 vite lektor në universitet dhe se është i njohur me sfidat që has rinia në tregun e punës.
“Këto janë realitete me të cilat përballen të gjithë të rinjtë në botë”, përfundoi ai.
