Qytetarë të Lushnjes zhvilluan sot një protestë para spitalit të qytetit, duke kërkuar reagimin e menjëhershëm të Qeverisë për plotësimin e kërkesave.
Deputeti demokrat Sajmir Korreshi u shpreh se sot qytetarët zhvilluan një protestë, përmes të cilës kërkojnë dinjitet.
Është protesta e parë, e një vale protestash që do të vijojnë, tha Korreshi, duke shtuar se qytetarët e Lushnjes sot folën duke protestuar dhe kërkuar investime nga qeveria.
Korreshi thotë se Lushnja ka folur me protestë, duke kërkuar spital rajonal me kushte dinjitoze.
‘Sot Lushnja foli, qytetarët kërkuan një Spital Rajonal me kushte dhe standarde dinjitoze për të gjithë ne.’, shkruan deputeti demokrat, Saimir Korreshi në reagimin e tij në rrjetet sociale.
Protestës iu bashkuan disa qindra banorë të Lushnjes, por sipas deputetit demokrat, pjesëmarrja do të ishte edhe më e lartë, nëse Qeveria dhe strukturat e saj, nuk do të ushtronin presion.
“Kam dhjetra e dhjetra mesazhe nga qytetarë që shprehin mbështetjen. Por nuk dalin të protestojnë sepse kjo surrat-Qeveri i kërcënon me bukën e gojës, me vendin e punës”, tha Korreshi.
