Tre persona të shpallur në kërkim ndërkombëtarë janë ekstraduar nga Italia, Gjermania dhe Mbretëria e Bashkuar, të akuzuar për disa vepra penale.
Sipas Policisë, nga Italia drejt Shqipërisë është ekstraduar shtetasi Sueld Elezi, i shpallur në kërkim ndërkombëtar për trafik ndërkombëtar droge. Gjykata e Posaçme kundër Korrupsionit dhe Krimit të Organizuar, me vendimin e datës 30 prill 2025, i kishte caktuar masën e sigurisë “Arrest në burg”.
Sipas autoriteteve, Elezi akuzohet se në vitin 2020, në bashkëpunim me persona të tjerë, ka trafikuar 2 kilogramë kokainë në Itali. Ndërsa gjatë vitit 2021, dyshohet se ka qenë pjesë e një grupi të strukturuar kriminal që trafikoi 932 kilogramë kokainë drejt shtetit italian.
Ndërkohë, nga Shqipëria janë ekstraduar dy persona të tjerë të kërkuar nga autoritetet e huaja.
Në Gjermani u ekstradua shtetasi Roy Garin, 43 vjeç, banues në Izrael. Autoritetet gjermane kishin lëshuar urdhër arresti ndaj tij për veprat penale “Organizata kriminale” dhe “Mashtrimi me shuma të mëdha”, në 33 raste të dokumentuara.
Po ashtu, drejt Mbretërisë së Bashkuar u ekstradua shtetasi Altin Shehu, 34 vjeç. Gjykata e Kentit të Veriut, me vendimin e datës 15 janar 2026, i kishte caktuar masën “Arrest në burg” për veprën penale të “Vrasjes”.
