Ndërkohë që kryeministri Edi Rama u nis për në Bruksel, për të marrë pjesë në takimin e radhës me përfaqësuesit ndërkombëtarë për ecurinë e vendit drejt Bashkimit Europian, në Tiranë ishte duke u konsumuar një ngjarje sa e rëndësishme, aq edhe e papritur.
Ministri i Kulturës, Blendi Gonxhja, kreu një vizitë të papritur dhe të shumëpritur në Sheshin “Skënderbej”. Nëse kjo ngjarje, për mendjet normale do të dukej ironi, nuk është kështu për Ministrinë e Kulturës së Shqipërisë.
Gonxhja u shkëput për pak kohë nga punët e tij të rëndësishme në krye të Kulturës shqiptare dhe vizitoi një fushë padeli, e vendosur përkohësisht në sheshin qendror të kryeqytetit. Padeli është një lojë e ngjashme me tenisin dhe ka krijuar përkrahës në radhët e elitës politike dhe të biznesit në Shqipëri.
Për këtë arsye, Blendi Gonxhja i rezervoi një vizitë përshëndetëse, me qëllim promovimin e vendit si një popull sport-dashës, pavarësisht se mbi 98 përqind e qytetarëve as nuk e kanë idenë se çfarë është padeli.
Pikërisht, për të ndriçuar mendjet e mbyllura të qytetarëve mbi këtë sport hibrid mes tenisit dhe “squashit”, një tjetër lojë që nuk frekuentohet në vendin tonë, ministri i rëndësishëm i kabinetit “Rama” i nderoi pjesëmarrësit me praninë e tij. /Boldnews
