Rusia dyshohet se ka bllokuar sinjalet e një avioni të RAF-it që transportonte ministrin britanik të mbrojtjes.
John Healey kishte vizituar ushtarët britanikë në Estoni dhe po kthehej drejt Mbretërisë së Bashkuar kur ndodhi sulmi elektronik të enjten.
Avioni po fluturonte pranë kufirit rus në atë moment.
Telefonat inteligjentë dhe laptopët nuk mund të lidheshin me internetin, ndërsa pilotët u detyruan të përdornin një sistem tjetër navigimi pasi GPS-ja e avionit u çaktivizua gjatë gjithë fluturimit treorësh.
Mendohet se pas incidentit qëndron Rusia. Nuk dihet nëse Healey ishte shënjestruar qëllimisht, por rruga e fluturimit ishte e dukshme në faqet që gjurmojnë avionët, raportoi The Times.
Pasagjerëve, mes të cilëve kishte fotografë dhe një reporter, iu tha se avioni Dassault Falcon 900LX mund të vazhdonte të operonte në mënyrë të sigurt.
Një burim i mbrojtjes tha: “Kjo është një ndërhyrje e papërgjegjshme nga Rusia, por RAF-i është i përgatitur mirë për t’u përballur me aktivitete të tilla.”
Incidenti ndodhi vetëm pak ditë pasi Ministria e Mbrojtjes njoftoi se dy avionë rusë ishin interceptuar “në mënyrë të përsëritur dhe të rrezikshme” pranë një avioni spiun të RAF-it mbi Detin e Zi.
Një avion rus Su-35 iu afrua aq shumë avionit britanik të zbulimit, sa aktivizoi sistemet emergjente të tij, përfshirë çaktivizimin e autopilotit.
Një tjetër avion Su-27 kaloi vetëm gjashtë metra larg hundës së avionit të paarmatosur Rivet Joint dhe bëri gjashtë kalime përpara tij.
Ministria e Mbrojtjes tha se ky ishte veprimi më i rrezikshëm rus kundër një avioni britanik Rivet Joint që nga viti 2022, kur një avion lëshoi një raketë mbi Detin e Zi.
Në mars të vitit 2024, një avion i RAF-it që transportonte Grant Shapps, sekretarin e atëhershëm të mbrojtjes, pati gjithashtu bllokim të sinjalit GPS ndërsa fluturonte pranë territorit rus.
Sinjali satelitor u ndërpre për rreth 30 minuta, ndërsa avioni po kthehej në Mbretërinë e Bashkuar nga Polonia.
