Gjykata e Lezhës ka caktuar masën e sigurisë “Arrest në burg” për 28-vjeçarin Amadeo Fufi, i arrestuar disa ditë më parë në Mamurras gjatë një operacioni policor të zhvilluar më 19 maj.
Sipas autoriteteve, ai shoqëronte një person të shpallur në kërkim dhe tentoi të largohej, duke rrezikuar efektivët e policisë.
28-vjeçari akuzohet për veprat penale “Mbajtje pa leje dhe prodhim i armëve, armëve shpërthyese dhe municionit”, si dhe “Kundërshtim i punonjësit të Policisë së Shtetit”.
Ndërkohë, masa e sigurisë për të riun tjetër, Leonard Dema, është zhvilluar në ambientet e Spitalit të Traumës në Tiranë, ku ai vijon të marrë trajtim mjekësor pas plagosjes gjatë ndërhyrjes së policisë.
Gjykata vendosi ndaj tij masën “Arrest në burg” me qëllim ekstradimin në Itali.
Sipas autoriteteve, ai rezulton i dënuar nga Gjykata e Trentos për veprën penale të “Tentativës për vrasje”, të parashikuar në Kodin Penal italian.
