Administrata e Donald Trump planifikon t’i informojë aleatët e NATO-s këtë javë se do ta kufizojë ndjeshëm gamën e aftësive ushtarake që Shtetet e Bashkuara mund t’i vënë në dispozicion aleancës në rast të një krize ose konflikti të madh, sipas tre burimeve të cituara nga Reuters.
Vendimi ka të bëjë me të ashtuquajturin “Model i Forcës së NATO-s”, kuadri përmes të cilit shtetet anëtare përcaktojnë se cilat forca ushtarake mund të aktivizohen në rast të një sulmi ose krize tjetër serioze që prek Aleancën.
Edhe pse përbërja e saktë e forcave të planifikuara për operacionet luftarake të NATO-s mbetet sekret, burime me njohuri për planifikimin i tregojnë agjencisë se Pentagoni ka vendosur ta zvogëlojë ndjeshëm kontributin e tij.
Ky zhvillim konsiderohet një mesazh i qartë nga politika e Trumpit se vendet evropiane duhet të marrin një rol udhëheqës në mbrojtjen e kontinentit të tyre, duke kufizuar varësinë nga Shtetet e Bashkuara.
Sipas të njëjtave informacione, qëllimi i Uashingtonit pritet të paraqitet zyrtarisht të premten në Bruksel, gjatë takimit të shefave të politikave mbrojtëse të NATO-s.
