Kreu i Partisë Demokratike, Sali Berisha, e nisi konferencën e tij për gazetarët në selinë blu me tone të ashpra ndaj kryeministrit Edi Rama.
Ai e akuzoi Ramën se ka fshehur pjesëmarrjen në Samitin Global për Demokracinë, që u zhvillua në Barcelonë.
Berisha deklaroi se kryeministri udhëtoi mijëra kilometra për të marrë pjesë në një ngjarje ndërkombëtare, por e prezantoi vizitën si një takim zyrtar me kryeministrin spanjoll Pedro Sanchez.
Sipas tij, Rama nuk i tha qytetarëve asnjë fjalë për samitin, duke e mbajtur të fshehtë pjesëmarrjen e tij.
“Si mund të quhet, çfarë emri mund t’i vihet një kryeministri, i cili fluturon disa mijëra kilometra nga vendi i tij për të marrë pjesë në një samit ndërkombëtar të titulluar Samiti Global për Demokracinë në Barcelonë dhe mashtron qytetarët e vet, u thotë se unë isha për një vizitë në Spanjë, tek Pedro Sanchez, dhe nuk thotë një fjalë të vetme, mban sekret për qytetarët e vendit të tij pjesëmarrjen në samitin global ku ishin një numër i caktuar kryetarësh shtetesh apo kryeministra, nga një seri vendesh të Amerikës Latine, të Afrikës dhe pjesë të tjera të globit.
Pra, edhe njëherë, kur një kryeministër shkon në një vend, merr pjesë në një samit sikur të ishte klandestin, në një kohë kur ajo ishte ngjarje publike ndërkombëtare, e ftuar nga kryeministri spanjoll, me një numër të konsiderueshëm kryeministrash dhe kryetarë shtetesh.
Çfarë emri mund t’i vini ju një kryeministri të tillë që fsheh pjesëmarrjen e tij në një samit ndërkombëtar dhe e shet se ishte për një vizitë zyrtare në Spanjë?
A mund ta quani këtë një burrec, një langaraq, por mundet edhe një prostitutë amorale politike?”, tha ai.
